鬼鬼吳映潔神隱半年宣布做媽咪 爸爸嫌疑人邱勝翊炎亞綸雙雙否認

35歲台灣女星鬼鬼吳映潔喺10號無預警喺社交平台公布重磅喜訊，宣布已誕下一女，榮升做媽咪。鬼鬼除咗post出自己嘅大肚孕照，仲加碼一張BB腳仔相。

鬼鬼吳映潔宣布已誕下一女，榮升做媽咪。
鬼鬼喺post仲寫到：「讓自己慢吓腳步，好好休息，好好孕育，好好兩個心臟一起呼吸著，好好記得這一切，好好感謝自己的勇氣，好好變成一個更勇敢的角色，好好愛妳，好好努力以後的生活，為了我們。」仲以「一場美麗又神奇的相遇」形容為人母嘅心情。

鬼鬼除咗post出自己嘅大肚孕照，仲加碼一張BB腳仔相。
鬼鬼最後一次公開露面係上年出席日本觀光活動，當時鬼鬼公開表示自己單身，亦冇追求者。而鬼鬼原本係實境節目《嗨！營業中》固定班底，上年八月播出嘅第四季，鬼鬼已經冇份，推算返時間，當時鬼鬼已在養胎。上年12月尾鬼鬼被目擊現身睇張惠妹演唱會，佢喺社交平台post出嘅最新近照，刻意著寬鬆毛毛褸遮肚，仲未恢復懷孕前嘅身形。

鬼鬼喺社交平台post出嘅最新近照，刻意著寬鬆毛毛褸遮肚。
鬼鬼生女嘅消息傳出後，大家好好奇究竟BB女嘅爸爸係邊個，當中嫌疑人包括鬼鬼緋聞對象王子邱勝翊同炎亞綸，人在日本拍外景嘅王子第一時間拍片否認，兼且拉埋棒棒堂幾位兄弟一齊送祝福，炎亞綸亦透過經理人送上祝福。

網民好好奇究竟BB女嘅爸爸係邊個，當中嫌疑人包括鬼鬼緋聞對象王子邱勝翊同炎亞綸。
可能知道大家對爸爸身份嘅好奇，鬼鬼再喺限時動態寫到「我沒有結婚，不要再問啦」，配上三個鬼臉emoji，不過相信如果鬼鬼一日唔公開爸爸身份，呢個估老竇遊戲應該會持續進行。

鬼鬼其後澄清「我沒有結婚，不要再問啦」。