朱千雪千度近視靠手術重見光明 一家三口韓國旅行讚老公係神隊友

朱千雪平日忙於律師工作，仲要照顧家庭，非常忙碌，不過佢呢日就抽空去到幼稚園，向小朋友宣揚護眼工作嘅重要性。講到同小朋友互動，當然難唔倒Tracy啦！加上自己嘅囝囝得幾個月大，所以對住呢班識駁嘴嘅小朋友，Tracy都覺得好新鮮，亦開始想像自己嘅囝囝讀幼稚園會係咩情景。
朱千雪呢日出席宣揚護眼活動。
講開護眼，Tracy就話自己好有心得，事關佢曾經試過有過千度近視，之後做咗矯視手術，得到重見光明嘅第二次機會，所以之後就非常注重眼睛嘅保養，尤其會減少玩電話嘅時間。
朱千雪同一眾小朋友一齊做活動。
Tracy啱啱同老公帶埋阿仔去咗韓國旅行，Tracy話帶住阿仔同行，確實係一個好大嘅考驗，少咗好多吃喝玩樂嘅時間，不過好彩佢老公自告奮勇可以睇住個仔，等Tracy可以有me time去行街，果然係名符其實嘅神隊友。