孕媽何依婷「一家三口」遊日本 無懼嚴寒著和服打卡

將會喺今年榮升做媽媽嘅 何依婷 ，而家已經懷有接近6個月身孕。為咗專心養胎，Regina已經好少公開露面，但佢亦不時喺社交平台分享生活小片段，趁個肚仲唔算太大嘅時候，繼續孖住老公四圍旅行嘆世界。

Regina懷孕期間仍同老公到處旅行放鬆心情
好似早前佢哋先去完海島之旅，日前又「一家三口」到日本旅行，Regina更預告呢次係佢孕期最後一次出旅。雖然當地天氣非常寒冷，但Regina都堅持著上和服到清水寺打卡，不過佢都有乖乖做足防寒準備，出動埋毛毛領巾保暖，仲自封係「小婷子」添。
日前佢就同老公到訪京都，仲換裝身穿和服遊覽

身穿粉色和服，set晒頭兼著埋木屐嘅Regina，喺藍天白雲下打卡，依然係咁靚，咁有氣質，被封「最美孕婦」嘅Regina未令大家失望。不過Regina話鏡頭後，要著住和服其實非常凍，所以佢同老公又急急腳去嘆熱辣辣嘅豆腐取暖，而入夜後，佢哋就去咗一間餐廳用膳，並欣賞八阪寶塔嘅夜景，Regina仲話自從懷孕後佢愛上飲Sparkling Tea(氣泡茶)，呢位孕婦果然好識嘆呀。

Regina仲話呢次係孕期內最後一次出遊，之後就會專心待產咁話