66歲百億富豪馬清鏗被爆婚外情 網紅五索為錢甘做情婦稱「斷網」爆正印毫不知情

34歲網紅「五索」鍾睿心（Rachel）近日同林作及裕美拍片博出位，而「五索」Rachel一直以闊太自居，佢被影到跟66歲大生銀行主席兼大生地產副主席馬清鏗喺餐廳密會兼疑似激吻，今日有報道稱Rachel已成為百億富豪「小三」長達九年，Rachel受傳媒訪問時坦言知男方有老婆，自己甘願為錢做「小三」，又指自己過得比正宮更有錢，強調有錢比結婚更重要，更揚言要「斷網」一段時間，怕事件牽涉到別人嘅家事。

據報道稱Rachel自細住喺大埔嘅唐樓，立志要成為有錢人，專黐有錢人做朋友，揀男友更係以對方身家過億為標準，有傳Rachel喺18歲嗰陣曾同富二代結婚，後嚟帶埋阿仔離開；Rachel盛傳喺「富豪飯局」識到富豪男友馬清鏗，Rachel搬進山頂豪宅，搖身一變成為身家過億「闊太」。

Rachel獲富豪男友「富商A」贈送市值9千萬嘅麥當勞道豪宅，試過周年紀念日，二人一齊喺杜拜坐直昇機慶祝，富豪男友更過數1千萬元作心意。難怪Rachel曾拍片自稱「錢多到使唔晒」；林作亦曾在片中聲稱為Rachel擔任顧問後生活無憂，幫Rachel喺短時間內打響知名度。

Rachel同馬清鏗日前慶祝相戀9周年紀念日，揀咗去名店掃貨，男友為Rachel購入十幾個名牌手袋，仲有飾物同化妝品等，二人情到濃時仲喺餐廳激吻，裕美曾現身為二人充當攝影師，Rachel即興坐喺馬清鏗大髀影相。

報道出街後有傳媒聯絡Rachel，Rachel稱尚未同馬清鏗聯絡，直認早知對方有老婆，亦唔覺為錢做情婦係唔啱，其後Rachel又拍片話呢件事怕牽涉到別人嘅家事，佢會暫時消失喺social media一段時間，Rachel又指馬清鏗老婆唔知有「小三」，又話自己唔想牽涉到其他人嘅事。對於「五索」Rachel驚出事又咁高調玩IG做網紅，有網民表示不解，而裕美就代回應「主要冇諗過咁快紅」。