流行都市丨彭慧中爭取去安德尊家中拜年 林秀怡祝大王與宋芝齡蛇年成婚

《流行都市》主持安德尊、張美妮、彭慧中（Phoebe）、林秀怡同胡諾言以充滿新春氣息嘅裝束，為節目進行錄影，三姐蕭秀香現身教大家煮賀年菜式。
三姐呢日嚟到《流行都市》教大家煮賀年菜式。
講到農曆新年，大家當然想逗利是取好意頭，秀怡同Phoebe已睇中逗利嘅目標人物，原來《流行都市》每年有個習俗就係去大王屋企拜年，不過大王每年都唔批准，美妮笑言因此一直證實唔到大王係咪元朗大地主，而秀怡同Phoebe就大嗌今年要爭取到大王屋企拜年成功，在場嘅大王笑而不語，三姐就解圍話大王唔介意派利是。
彭慧中同林秀怡都祝大王安德尊蛇年可以同宋芝齡拉埋天窗。
講完拜年逗利是，一眾主持就轉移話題去關心大王蛇年姻緣，仲話祝願大王同宋芝齡喺蛇年拉埋天窗，兼且已準備好人情，而主角嘅大王就堅持笑笑口唔回應。