黃劍文首次搞周年慶功宴 載歌載舞答謝粉絲愛戴

2024年對於黃劍文（Kimman）嚟講係好特別嘅一年，除咗完成《中年好聲音2》嘅賽事，又參與咗音樂劇同舉行首個個人演唱會，呢一切嘅經歷，Kimman好感激一班愛戴佢嘅粉絲Kimchi Family。
黃劍文舉行人生首個Annual Dinner。
為咗答謝大家，Kimman舉行咗人生首個Annual Dinner，同超過200位Kimchi慶祝，Kimman唔只同大家食飯傾偈，仲喺台上獻唱一連串歌曲，甚至勁歌熱舞，兼且走埋落台握手。Kimman話好感激一班粉絲喺過去一年幾嘅支持，而呢次晚宴亦係大家等咗好耐嘅活動。
黃劍文喺台上又唱又跳，以答謝一眾fans。
晚宴上，Kimman加插咗簽名會，因為Kimchi Family為佢印製咗一本紀念相集，將佢嘅演唱會同音樂劇靚相記錄落嚟，Kimman趁呢個難得機會為大家簽名留念。
Kimchi Family為黃劍文印製咗一本紀念相集。