衛詩雅分享過大禮難忘事 差啲因太肚餓誤食儀式喜餅

待嫁新娘衛詩雅以一身紅裙現身活動，日前佢喺社交平台分享過大禮相片，成個儀式嘅排場非常壯觀，放滿金器同喜餅。
衛詩雅呢日出席公開活動。
衛詩雅話成個過程感覺好得意，因為以前見人哋過大禮好勁，原來自己過大禮時同樣係好勁，加上有好多傳統儀式要遵守，例如事前唔可以見未婚夫，儀式上又有大妗姐嗌口號，完成儀式之後，足足要來回兩次先可以帶走所有物品。
衛詩雅指早前過大禮時爭啲鬧出笑話。
談到過大禮難忘時刻，衛詩雅就鬼馬話：「唔可以食喜餅，因為我當時好肚餓，當我準備想食時，大妗姐話新郎新娘係唔可以食自己嘅喜餅。」衛詩雅將於下月舉行婚禮，但係工作仍然排得密密麻麻，所以連婚宴嘅賓客名單都拖到最後一刻先處理，笑指要酒店催促先逼自己完成。