最新‧多圖丨高鈞賢喜迎愛女高子琳出世 親述入產房剪臍帶形容感覺好神奇❤️

40歲高鈞賢去年宣布雙喜臨門成人夫，與細10歲圈外女友喺加拿大註冊結婚，更宣布老婆陀B女，高鈞賢今日分享初為人父嘅消息，原來佢喺1月15號榮升爸爸，太太誕下「小龍女」高子琳（Liona），母女平安。

高鈞賢接受語音訪問時難掩為人父嘅喜悅：「好開心，自己由05年選香港先生入行，人生拼搏咗20年，呢個係人生一個新階段，擔當一個重要主角。太太都好辛苦，因為有高血壓，母女平安。」

高鈞賢雖然工作繁忙，但佢而家將以家庭為先，BB出世後樣子每日變化，好珍惜每分每秒，而高鈞賢亦有入產房為B女剪臍帶，佢形容感覺好神奇：「啱啱試咗餵奶，雖然上過堂，但係唔記得咗，第一次換尿片好緊張，覺得過程好開心。太太半身麻醉生產，喺產房陪住佢、嗌佢出力，好似拍緊TVB劇集咁。」高鈞賢指做母親好偉大，以後佢會好好愛錫老婆同阿女。

高鈞賢早前喺醫院為老婆準備梳洗用品，更細心購買坐月必須品，透露希望老婆喺家中坐月，努力準備咗一個舒適坐月環境，收工後方便陪老婆同幫手湊B。