何廣沛收指令為新聞女王2減脂 葉蒨文期待拍戀綜覓得另一半

江嘉敏 何廣沛 同 葉蒨文 齊齊現身一個慈善晚宴，新年將至，大家都已經plan晒點過年，不過廣沛就話自己會一路由收爐做到開爐，唔單止冇得休息，仲冇啖好食㖭，事關佢已經收到指示，要開始為《新聞女王2》戒口，佢話：「3月就要開拍《新聞女王2》，早幾日《夫妻的博弈》煞科宴，佳導鍾澍佳已經落咗order要我開始減脂，食雞胸之路又要開始重覆啦！」廣沛話減肥唔辛苦，但因為撞正新年，太多美食誘惑，要忍口真係好煎熬。

晚晚深夜都出現嘅何廣沛，指已收到要減肥嘅指令
葉蒨文近日就忙於為年初三嘅澳門花車巡遊排練，講到新一年嘅工作計劃，佢就透露會拍攝戀愛真人騷：「其實我一路都好想拍綜藝，今年有機會參加Bob主持嘅戀綜，因為我目前係單身，所以我都期待可以喺呢個節目搵到另一半。」
葉蒨文話希望拍攝戀綜會令自己遇到另一半

江嘉敏雖然少咗亮相幕前，不過佢一路密密拍劇，已經累積咗唔少作品，其中有個角色佢自己非常鍾意，就係飾演心理治療師，Kaman話自己係第一次飾演專業人士，所以背對白方面好有難度，自己仲親自相真正嘅心理治療師取景，希望可以演得傳神啲。
江嘉敏早前拍劇扮演心理治療師令佢非常高興