趙頌茹計劃同家人睇極光 愛女網友係自己歌迷

趙頌茹呢日出席一個極光相片展，仲未有機會親眼睇極光嘅阿Yu，坦言睇極光係喺佢人生清單上嘅其中一項，不過由於佢自己冇車牌，加上睇極光又需要天時地利人和，所以阿Yu笑言打算等小朋友大個後，大家可以共同承擔責任，逼個女去考車牌，再載埋佢一齊去睇極光。阿Yu又指兩個囡囡係佢睇極光成員嘅必定人選，因為呢份幸福佢最想同家人分享呀。
趙頌茹計劃同囡囡去睇極光。
以歌手身份出道嘅阿Yu，表示未來想以拍劇同電影演出為主，佢仲話想挑戰媽媽同奶奶嘅角色，因為呢啲角色都可以磨練到自己演技。阿Yu又分享囡囡同一位澳門網友嘅趣事，佢指嗰位網友有日同囡囡分享自己鍾意女歌手，點知一講原來對方係鍾意自己，佢個大女聽到嗰一刻都有啲愕然，但同時都開心同對方分享呢位女歌手係自己媽咪。

至於講到兩個囡囡，阿Yu就話佢哋都好生性，只係比較大頭蝦，希望佢哋再大個啲之後會有所改變。