張敬軒唱足33場破澳門記錄 重提與父往事哽咽勸惜家人

張敬軒 於澳門舉行嘅33場演唱會日前圓滿結束。今次軒公仲一舉打破場地場次同澳門演唱會史上紀錄，認真厲害。

再次重臨澳門澳門開騷嘅佢，今次為演唱會轉新歌單同新歌衫等新元素，唔止歌迷搶飛困難，亦有唔少好友跨海到當地欣賞。軒仔指呢次33場演出，係人生中最長一次駐場演唱會，仲有香港、內地同世界唔同地方歌迷入場欣賞演出。
軒公嘅澳門演出破盡場地同澳門演唱會紀錄

演唱會亦有售賣唔同周邊，今次更加入膠花出售，Fans事前就於社交媒體瘋狂討論，仲指要揪出「幕後黑手」，而軒公亦喺社交媒體稱並非自己主意，而開賣後膠花每日都售罄，「奇怪」現象，令軒仔於都忍唔住問：「原來真係會有人買膠花㗎 ！我未追究到邊個諗呢支膠花出嚟！但買還買，唔好將兩支花擺喺我隻黑膠碟兩邊，坐喺度嘅時候我有啲驚，或者隻黑膠碟唔好楝喺前面。其實要講返，主辦單位同我講係絲花嚟。但有區別咩其實？」引來全場大笑。

演出亦勾起軒仔唔少童年往事，自細已喜歡恐龍嘅佢﹐小學時希望參觀一個恐龍展，不過門票要價50元：「喺嗰陣時50蚊已經係屋企一家三口差唔多三分一個月、甚至半個月嘅口糧。爸爸冇出聲，然後話星期六同我去。」
佢又回憶早年同爸爸之間嘅回憶

軒仔當時跟爸爸到體育館門口，剛好有位於展覽工作嘅阿姨經過，「爸爸問阿姨：『我哋屋企比較困難，但係我個仔又好想去，所以好希望你可以幫我呢個忙，你帶咗佢入去就得㗎啦，你唔使理佢㗎。』位Auntie好好咁帶咗我入去，行咗幾步擰返轉頭見到我老竇，佢係一個殘疾人，鋪咗張報紙喺地下坐喺街邊、坐喺部單車隔離，等我睇完出嚟。我已經入咗閘㗎啦，我喺閘入面衝返出嚟，『爸爸我唔去啦，你唔同我去我都唔去。』然後我老竇就有少少發憫憎：『我已經厚住面皮叫個阿姨接你入去，你都唔去！』」
今次演出佢亦換歌單同新歌衫演出

軒仔開始哽咽續說：「我話唔好啦，我唔想抌低爸爸。所以綵排唱呢一首《故園花茶》嘅時候，尤其我爸爸媽媽最近重新搬返嚟香港，其實佢哋走咗唔係好多個月㗎咋，佢哋三個月返咗去，跟住返嚟，我見到我老竇又老咗一圈⋯⋯ 所以我想藉住呢首《故園花茶》、藉着內心呢份情感，喺度同各位真心講一句，當大家有時間多啲返去陪吓爸爸媽媽，因為佢哋唔係事必喺我哋身邊。」
軒公希望大家都珍惜同家人相處嘅時光

而恐龍展故事仍有後續，軒仔補充話：「其實之後我同爸爸離開體育館準備返屋企嘅途中，見到體育館外圍嘅鐵絲網穿咗個㝫喎，最後我同爸爸就喺呢個窿入咗去睇恐龍展。」全場頓時爆笑，佢再笑說：「我諗今日應該唔會有人睇霸王飛啩，嗱！我唔係鼓勵人睇霸王飛呀。」