黃翠如取湊B經變爸爸訓練營？ 蕭正楠無奈湊「小魚」 陳家樂戙高腳影最Pro

43歲黃翠如陀B以嚟冇公開胎兒性別，亦冇透露預產期，噚晚佢喺社交平台貼出連詩雅（Shiga）、梁諾妍（Inez）嘅聚會相，同場仲有陳家樂、蕭正楠及洪永城（Tony），大家一齊分享湊B心得，Shiga同Inez就帶埋B女出席。

黃翠如向好姊妹連詩雅同梁諾妍取生B經。
靚孕婦翠如曬出嘅合照，可見佢一臉幸福洋溢，好拍檔Tony即搞笑留言：「等咗咁多年，你開始有...女人味！」翠如連日有向唔少圈中好友取湊B經，呢晚佢哋就三個家庭快樂相聚咗一晚❤️，大家似乎好滿足，「女士們忙着分享生B經，男士們忙着氹女仔，除了一個...」翠如口中講嗰個就係老公蕭正楠喇！

翠如連日有向唔少圈中好友取湊B經，呢晚佢哋就三個家庭快樂相聚咗一晚。
事關相中見3位男士自成一角，家樂同Tony有女萬事足，抱住自己個女即露出慈父嘅甜笑，Tony餵細女「Sir Face 2.0」Beryl飲奶、家樂就陪阿女Camila玩，蕭正楠則一臉無奈抱住隻「小魚」公仔，畫面相當好笑，蕭正楠解釋：「我氹緊小魚。」

蕭正楠一臉無奈抱住隻「小魚」公仔。
網民笑問蕭正楠做咩唔借Tony大女Amber嚟抱住先，亦有網民安撫蕭正楠好快有得抱真人版，連詩雅都留言大爆：「baby date very soon❤️❤️❤️❤️」

Tony餵細女Beryl飲奶、家樂就陪阿女Camila玩，只有蕭正楠無所事事。
另一張相就見家樂、蕭正楠同Tony各自拎住手機幫三位靚媽影相，當中家樂仲影到戙起隻腳，獲網民讚影得最專業，連吳若希忍唔住問：「係咪爸爸訓練營？😂」

家樂、蕭正楠同Tony各自拎住手機幫三位靚媽影相。