黃翠如挺巨肚現身拖小男孩有寓意？ 開心獲靚媽楊茜堯贈BB衣服沾福氣

準媽媽黃翠如踏入2025年首度現身公開活動，陀住巨肚依然神采飛揚，喺現場拖住可愛嘅小男孩影相時，洋溢幸福媽咪嘅氣質。以往每逢節日翠如都忙於佈置屋企，嚟緊嘅農曆年，翠如就話屋企比較混亂，佢同老公蕭正楠要忙住開箱準備好BB用品，佢好享受呢個開心過程，若有揼釘嗰啲，翠如依足傳統習俗離開屋企。
黃翠如挺住個巨肚出席活動。
翠如同阿蕭至今未有公開BB性別，想留有一點秘密，而活動上就安排翠如同小男孩合照，唔通有所寓意？翠如話本身大會主題係粉紅色，特意以一身粉紅裝扮現身，一心以為會同小女孩合照，自己都意想唔到，又大讚小男孩好靚仔，被小孩吸引望多兩眼。
黃翠如拖住個小男孩現身有暗示？
一般準爸爸媽媽會喺BB未出世之前，四出買BB衫同玩具，翠如同阿蕭早前出動過去睇有咩需要，不過行完之後發現太多分類，加上二人對呢方面唔熟識，最後空手而回。翠如好開心獲得《黑色月光》二家姐楊茜堯慷慨，將仔女嘅BB衫送畀佢，自己完全唔介意，覺得係好好嘅福氣，亦可以響應環保，翠如搵日去二家姐嗰度揀BB衫及啱用物品，之後先再睇有咩需要再購買。
翠如話農曆新年要忙住同老公準備BB嘢。
稍後1月19號係台慶頒獎禮嘅日子，有份入圍角逐獎項嘅翠如話本來諗住活動後返公司出席盆菜宴為自己拉票，由於近日流感高峰期，公司同事勸佢唔好出現人多地方，所以翠如趁機拉票。
翠如趁機拉票。