蕭正楠曹永廉邀黎耀祥現身勾起肥太監回憶 黃翠如安胎分隔兩地依然甜到漏

準爸爸蕭正楠努力賺奶粉錢，呢日佢孖住好兄弟曹永廉喺廣州舉行音樂會，全場座無虛席，觀眾反應不錯，二人仲唱咗唔少耳熟能詳嘅經典歌曲，默契爆登，合拍度十足！

蕭正楠同曹永廉喺廣州開騷
呢晚視帝黎耀祥驚喜現身做嘉賓，三人難得合體，勾起當年拍TVB劇集《大太監》嘅回憶，黎耀祥難忘喺橫店每晚一齊食飯，佢哋餐餐係咁食羊肉，拍咗個幾月即變咗「肥太監」，成個人脹晒咁出嚟，黎耀祥笑指當時身形啱劇情，皆因佢哋喺宮中好食好住。
仲搵埋《大太監》嘅好拍檔黎耀祥擔任嘉賓

阿蕭同阿廉好感謝黎耀祥百忙之中特登抽時間過嚟站台，阿蕭嘅太太黃翠如雖然冇到場，不過阿廉爆佢哋分隔兩地依然甜到爆，阿蕭出場前仍跟翠如視訊非常甜蜜，阿蕭解釋暫時唔想太太去人多嘅地方，怕唔小心撞到就唔好。
阿廉仲爆阿蕭同翠如開騷前仲仍視訊見面

阿蕭同阿廉不時互窒對方，阿廉笑言上年推晒啲男主角，等阿蕭有機會攞獎，阿蕭反駁話係高層幫佢推咗，阿廉笑阿蕭今年未能衝擊視帝，入男配角係好事，似乎機會更加高，而阿蕭就恨同太太一齊攞獎，到時三喜臨門！