陶大宇莫家淦無懼賣豬仔赴柬埔寨登台 喜見當地眾多TVB粉絲熱情應援

內地演員王星遭誘騙至緬甸事件，搞到人心惶惶，喺呢個風頭火勢下，陶大宇 同 莫家淦 就無懼「賣豬仔」嘅危機，齊齊去到同樣有詐騙園區嘅柬埔寨登台，仲有唔少網民都留言叮囑佢哋要萬事小心。

大宇應邀到柬埔寨登台，不過就未擔心會被誘拐喇
不過大宇同Keith就無有怕，抵達當地後，唔單止獲大會帝皇級招待，出動名車接送，而隨行亦都有保鑣貼身照顧，所以大宇同Keith都覺得好安心，並強調佢哋前往工作嘅地方相當安全，叫大家唔好擔心。

大宇同Keith更分別透過語音訊息，分享呢次出行嘅感受，大宇表示多謝大家關心，佢話好多朋友知道佢要去柬埔寨登台都覺得好驚訝，但佢話自己其實對柬埔寨一啲都唔陌生，除咗去過幾次之外，嗰邊亦有好多做生意嘅朋友，加上當地係一個好和平、好平靜嘅地方，而當地人亦都好善良，同發生詐騙事件嘅區域更係相隔十萬八千里，所以呢次工作之餘，佢同Keith都有去市中心觀光，並品嚐一下路邊攤嘅地道小食，寓工作於旅遊。
此行佢同莫家淦一齊飛到當地，仲趁機遊覽

而Keith亦表示，起初有少少擔心，但因為呢次登台嘅工作係經熟朋友介紹，加上有朋友喺當地工作，對當地環境好了解，所以令Keith都覺得好安心，而最令Keith驚訝嘅係當地原來有好多TVB粉絲，佢哋唔單止認識Keith嘅作品，連《新聞女王》都有捧場，可見TVB嘅力量真係無遠弗屆。
Keith指出發前曾有輕微擔心

而大宇同埋Keith喺登台後，亦有喺社交平台分享登台嘅片段同相片，見當地粉絲的確相當熱情，舉牌支持相當投入，令大宇同Keith都相當難忘，Keith留言表示：「很開心可以成為你們第一批演出的藝人。」