Yanny密謀明年初舉行海外婚禮 廖子妤蛇年目標考車學裁縫

即將踏入蛇年，古天樂旗下公司藝人余香凝、廖子妤、陳穎欣（Yanny）、麥子樂及蔡明思（Jessica）等提早舉行新春團拜，熱熱鬧鬧迎接新年來臨，Jessica順利誕第二胎後復出，Yanny將喺蛇年跟拍拖近8年嘅音樂人男友陳考威拉埋天窗。

古天樂旗下公司藝人提早舉行新春團拜，熱熱鬧鬧迎接新年來臨。
陳考威早前宣布年內與女友Yanny拉埋天窗，榮升做準人妻嘅Yanny，喺蛇年最後一次以「女朋友」身份過新春，佢笑言最後一年𢭃利是，新年準備出發去北海道旅行。Yanny希望喺2026年初舉行婚禮，目前仍有工作在身：「婚禮希望盡量得閒啲先搞，同埋唔想喺好熱同雨季度搞。本身個婚禮想去日本舉行，但傳聞有啲天災，唔想到時賓客同自己會擔心，可能會轉地方，而家仲物色緊邊度有舒服、安全又有啲好回憶嘅地方。」

Jessica日前順利誕第二胎，指坐月後將全面復出。
Yanny笑言對男友無預警宣布婚訊，忽然收到好多Message同打電話恭賀，Yanny話嗰刻好大壓力，要第二日收拾心情先再覆，Yanny續言：「佢唔係一個甜蜜嘅人，佢好木訥，我知佢如果得獎，佢話會多謝我，我仲諗佢唔會講呢樣嘢（指結婚），佢幾怕醜。」

Yanny將喺蛇年跟拍拖近8年嘅音樂人男友陳考威拉埋天窗。
Yanny認為毋須為成為人妻作準備，覺得婚後生活冇乜分別，而且二人一直同居，Yanny話只係多咗個稱呼：「我自己聽到家姐叫姐夫做老公，或姐夫叫家姐做老婆，感覺好奇怪，因為太親暱，我諗我同佢要一段時間先消化呢個稱號。」34歲Yanny婚後仍會繼續幕前工作，暫時冇生B計劃。

廖子妤蛇年目標考車及學裁縫。
Jessica日前順利誕第二胎，話今胎比上胎陀得辛苦：「見到自己身體變化，可能好肥，今胎我成日都好肚餓，好驚自己再食落去，一發不可收拾；第一胎冇經驗，事事覺得新奇，但陀第二胎，要湊住大女，好吃力。」Jessica指坐月後將全面復出。提到好姊妹Yanny將結婚，佢自薦做婚禮姊妹。而廖子妤蛇年目標考車及學裁縫，佢本身對改造衫有興趣，希望透過呢個興趣令心情平靜。