曾志偉坦言轉評審機制唔再續約換獎 今屆得獎者憑實力奪獎冇得講條件

TVB行政主席許濤、節目內容營運總經理曾志偉、商務營運總經理蕭世和，以及TVB一眾高層呢日喺電視城錄影蛇年新春節目，由汪明荃、許文軒、支嚳儀、林盛斌（Bob）同朱凱婷擔任主持。

TVB新春節目錄影，主席許濤向同事派利是
財神胡楓一出場立即歡呼聲不斷，三位高層喺胡楓手上接財神，隨即向職藝員大派利是，不少職藝員蜂擁而上沾吓旺氣，場面熱鬧；《萬千星輝頒獎典禮2024》圓滿落幕，賽果引起觀眾談論度極高，志偉有留意相關消息，話今年可能冇大家心目中出名啲嘅藝人攞獎，又或者唔畀邊個嗰啲，志偉話林景程好多年都陪跑，今年票數拋離好多，今年係應該畀景程，今年好多演員一聽到自己得獎即喊出嚟，指成績絕對公平公正。
志偉亦向幾位主持派利是，又提到台慶頒獎禮引起嘅討論

志偉坦言以前出現續約換條件，而家係唔使講條件，每一個人都係憑實力，評審機制係決定喺觀眾及職藝員投票手上，叫啲人畀啲心機同啲同事相處好啲，又或者同觀眾及影迷拉好啲關係咁仲好。

講到新抱王敏奕喺頒獎禮獲最佳衣著獎，即刻向老爺報喜惹嚟全場爆笑，志偉笑新抱仔好烏龍，以為畫面唔播出街，志偉一聽到嗌「老爺」即被嚇親，心諗啲人一定以為係派獎，志偉笑指唔關自己事，呢個獎真係新聞界朋友投票㗎！
提到新抱得衣著獎嘅蝦碌事件，佢就笑稱Venus得獎係由現場記者投票結果喇

農曆新年將至，阿姐同Bob佢哋都忙於大掃除同封利是，同埋預備充足食物過肥年，阿姐話一定行花市買花，而Bob準備紅色、金色同銀色新內褲旺蛇年；許文軒就準備咗500封開工利是派畀幕後同事，而中聲及聲夢家族就相約大團年，林沚羿笑指佢哋《聲夢》好著數，可以攞好多利是。

幾位主持都各有過年小習慣

中聲+聲夢成員將於節目中演出迎新春