萬千星輝頒獎典禮丨曾志偉碌爆人情卡邀請嘉賓 多對經典組合現身勾起回憶殺

《萬千星輝頒獎典禮2024》圓滿落幕，除咗得獎名單有驚喜外，今年嘅頒獎嘉賓更加令大家喜出望外，宇宙最強 甄子丹 頒發最佳劇集，佢仲帶埋正日生日嘅囡囡 甄濟如Jasmine 以及太太 汪詩詩 同行。

甄子丹頒發最佳劇集，同時為大家謀福利求加薪
丹爺除咗恭喜得獎者外，仲喺台上為大家謀福利叫加人工，事後佢就話同咁多位老闆都認識，所以先幫口講兩句，佢笑言相信一定會加人工嘅。至於講到點同剛滿21歲嘅Jasmine慶祝？丹爺就話做完頒發嘉賓後就會即刻去會合太太同囡囡。

張耀揚同李子雄同台頒獎，即刻令大家勾起佢哋飾演嘅反派角色，唔講唔知原來佢哋自己都會不時重溫自己嘅作品，李子雄仲話有時搭飛機見到附近乘客睇佢有份演出嘅《英雄本色》時，都會偷偷影低。張耀揚就話而家睇返自己演「烏鴉」呢個角色時都會笑，因為佢覺得個角色好得意，又指編劇同導演都好落力為佢哋造就一個角色。
烏鴉哥張耀揚同李子雄亦久違現身

邵美琪同溫兆倫呢對《我本善良》CP合體頒獎，相信都勾起唔少人回憶，邵美琪指雖然佢同溫兆倫唔係成日見面，不過因為自己成日都會重溫《我本善良》，所以感覺就好似成日見咁。而溫兆倫就表示可以藉今次頒獎呢個機會，畀佢哋都多謝一下TVB，因為TVB真係製作咗無數經典劇集。
曾合作《我本善良》嘅邵美琪同溫兆倫亦再重聚

勾起回憶殺嘅仲有呢對《無頭東宮》嘅好姐妹，好耐冇見嘅陳妙瑛狀態大勇，大家都好期待佢哋嘅幕前演出，向海嵐就指睇到網民話每次見到佢同陳妙瑛「合體」都會好開心，而佢亦好開心大家相隔咁多年都仲記得同鍾意佢哋；而陳妙瑛就話相當感恩，自己已經咁耐冇喺幕前演出，但大家都仲咁鍾意佢。至於問到有冇機會見到佢哋再次合體於幕前演出？陳妙瑛就話世事無絕對，佢又指之前都有監製問過，但當時因為自己嘅生意太忙而未有答應，向海嵐則指佢哋每次聚會時都會有傾呢個話題，如果時機啱嘅都唔排除有可能呀。
《無頭東宮》兩位娘娘齊齊出現

兩位三屆視帝紀錄保持人羅嘉良同黎耀祥則一齊揭曉今屆視帝，雖然祥仔都係今屆視帝候選人之一，但佢就話喺台上並唔緊張，仲話有嘉良呢位老朋友喺身邊就已經夠放鬆，佢又指因為當年大家合作咗好多套劇集，當時大家食飯瞓覺都幾乎一齊，所以相信熟稔。
兩位同係三屆視帝嘅黎耀祥同羅嘉良頒發視帝最有說服力

另外仲有任達華、方中信、許紹雄、溫碧霞、林嘉華、韓毓霞等為頒獎典禮擔任頒獎嘉賓，能夠有呢個豪華頒獎陣容，全靠曾志偉碌爆人情卡。志偉指事前向好多同事做過調查，問大家想見到咩嘉賓，同時又希望每組嘉賓都會同個獎項有少少關係，而當佢親自打電話邀講大家時，大家都好畀面，加上好多位都係喺TVB大，所以好多人都好懷念返嚟TVB呀。