邵美琪下月60歲生日獲溫兆倫送金牌 網民對《義不容情》留陰影：總覺得會推佢落台

《萬千星輝頒獎典禮2024》噚日喺澳門圓滿舉行，今年邀請唔少重量級頒獎嘉賓坐鎮，當中有90年代公認「最佳螢幕CP」邵美琪同溫兆倫。

90年代公認「最佳螢幕CP」邵美琪同溫兆倫。
溫兆倫同邵美琪早喺1988年合作拍首部電視劇《義不容情》，該劇喺1989年播出深受觀眾歡迎，溫兆倫有一幕更令觀眾難以忘懷，就係「丁有康」為識富家女，狠心推劇中女友邵美琪出火車嗰幕經典畫面，其後二人拍《我本善良》及《今生無悔》等經典劇集，成為當年螢幕CP。

溫兆倫同邵美琪早喺1988年合作拍首部電視劇《義不容情》，該劇喺1989年播出深受觀眾歡迎。
溫兆倫同邵美琪今次再度合體喺台上笑談合作舊事，二人仍然默契十足，溫兆倫先踢爆邵美琪出場前講明希望少講嘢，搞吓氣氛；接住溫兆倫提起當年喺英國拍完《我本善良》，就將取景用嘅大屋買咗，仲叫老拍檔下次去英國舊地重遊，跟住又指嗰間大屋已夷為平地再起過新屋。

「丁有康」溫兆倫為識富家女，狠心推劇中女友邵美琪出火車經典畫面。
溫兆倫講講吓忽然拎出一個寫上「happy birthday」金牌，當場送畀邵美琪，提前祝賀2月壽星邵美琪，令邵美琪有啲受寵若驚，仲開心問「真㗎」，跟手仲互笠高帽，稱為對方先出席擔任嘉賓，繼而互相擁抱一下。

溫兆倫同邵美琪今次再度合體喺台上笑談合作舊事，二人仍然默契十足。
邵美琪同溫兆倫受訪時更透露大約廿年未見面，不過彼此一直有聯絡。唔少網民以前睇《義不容情》仍有有「心理陰影」，留言稱「好驚佢又被人推多次出火車」、「我總覺得溫兆倫會推邵美琪落台」。

唔少網民以前睇《義不容情》仍有有「心理陰影」。
另有網民數過邵美琪同溫兆倫合作拍咗4套劇，當中邵美琪被殺咗兩次，直至第4次合作拍《第三類法庭》，邵美琪先終於報到仇，溫兆倫受訪時話知對方知道下月生日特登買咗兩塊金牌仔，對於有傳當年兩人不和，溫兆倫笑言當年拍劇劇情推咗佢落火車，之後套劇（指《第三類法庭》）已畀邵美琪報仇。