李司棋斥電話詐騙猖狂戥受害人心悒 陳敏之進軍直播帶貨呻荷包拮据

李司棋同陳敏之喺經典劇集《溏心風暴》系列飾演兩母女，呢日佢哋再度聚頭，近日司棋姐喺網上疑似分享網騙資訊，仲以《溏心風暴》經典金句擊退騙徒。
李司棋同陳敏之喺經典劇集《溏心風暴》系列中飾演兩母女。
司棋姐解釋係一個防騙活動前奏，又提醒大家收到騙徒訊息係唔應該傾咁多，記得馬上收線，千祈唔好開聲講嘢，怕對方用把聲去呃自己屋企人，司棋姐坦言騙徒好猖狂，見到好多人中招，諗起好多人唔見咗好多錢，戥佢哋心悒，皆因大家搵錢都唔容易。
司棋姐早前以金句擊退騙徒。
司棋姐話以前屋企有固網電話，有次有人打嚟叫阿媽，又話返嚟食飯，司棋姐知道對方係騙徒，即同對方講呢度好多警察守候；同場嘅敏之啱啱度過46歲生日，低調與親友陪伴慶祝，佢默默紀念去年已故嘅母親，而敏之最開心係收到阿仔手畫嘅生日卡，又送吻及擁抱，令敏之好滿足！
陳敏之指自己荷包拮据。
敏之近年成功進軍帶貨行列呻荷包拮据，佢笑指買到破產，每次都帶個銀包返嚟開工，基本上出糧嘅錢都用咗嚟買嘢，成日幾箱幾箱咁拎返去。