容祖兒專程支持阿Sa新戲 首見心中男神朱栢康超興奮

張繼聰 蔡卓妍 朱栢康 吳家忻 等呢日為主演賀歲片嘅名人優先場宣傳，電影雖然未正式上映，之前宣傳時齋睇阿聰同阿Sa佢哋嘅對談已經笑到肚攣，吸引一眾圈中好友嚟撐場，個個希望入場笑餐飽。

阿聰同阿Sa合演嘅賀歲新片舉行優先場
阿Sa好友 容祖兒都嚟開心吓，順便力撐佢口中好靚仔嘅朱康。Joey見到朱康即時超級興奮，展現心心眼，仲擺出開心到單腳飛起嘅少女Pose同男神合照，反而朱康顯得受寵若驚相當怕醜，成個人硬晒軚。
祖兒如願直接到朱栢康見面

當朱康被記者告知Joey封佢為男神，靚仔級別直逼劉謙俊，佢即時話唔敢相信，仲話係阿Sa夾埋好姊妹整蠱佢。 
朱康死都唔信祖兒傾慕自己又讚靚仔有型

Joey大方公開「示愛」，好姊妹阿Sa雖然話唔需要做媒人撮合朱康同Joey，但都會做中間人介紹兩位正式認識。 至於阿Sa早前受訪時漏口風，感情似乎有著落，但尚未到100%肯定階段，呢日佢被問感情狀況時就顯得相當口密。
阿Sa呢日被追問感情事時，阿聰出手代解圍

仲有幾日就到農曆新年，之前阿聰同朱康都呼籲過入場嘅觀眾記得喺謝票時準備利是，而佢哋亦安排好新春期間隨時會踩入戲院感受吓熱鬧嘅氣氛。阿Sa準備魚網入場謝票，接受觀眾嘅利是，阿聰仲精明話會自備QR Code接收大家嘅電子紅包，咩國家嘅貨幣都唔拘。為咗專心謝票阿Sa打消農曆年期出遊嘅計劃。