修哥包場邀好友欣賞賀歲片 蔡卓妍張繼聰驚喜現身

賀歲片《祥賭必贏》將喺年廿九公映，蔡卓妍及張繼聰上畫前夕四出謝票，噚日驚喜現身為胡楓（修哥）VIP包場謝票，畀戲中飾演阿聰爺爺嘅胡楓一個驚喜，VIP包場座上客包括有姜大衞、陳友、袁文傑、劉錫賢、黃文慧、Joe Junior 、梁葆貞、劉錫賢及周美鳳等場面熱鬧。

蔡卓妍及張繼聰噚日驚喜現身為胡楓VIP包場謝票送上驚喜。
3位以神秘嘉賓姿態現身修哥包場放映，阿Sa同阿聰仲同劇中角色一樣，稱呼修哥做「阿爺」，修哥見到大家嚟謝票相當開心，尤其見到阿Sa特別驚喜，以為對方正身處外埠開Twins巡唱，修哥大讚作品：「多謝兩位主角落力演出，同你哋兩個合作我唔落力都唔得呀！」修哥又向全場觀眾力推羅導，最後全場大合照。

修哥見到大家嚟謝票相當開心，尤其見到阿Sa特別驚喜。

胡楓戲中飾演阿聰爺爺。
阿Sa笑指今趟謝票心情有啲唔一樣:「我好緊張，因為聽講修哥包呢一場，係有好多前輩，甚至係殿堂級嘅前輩。」阿聰亦好開心見到修哥：「祝修哥身體健康、風流倜儻、繼續做到自己想做嘅嘢。」周末連續兩日，三位走勻港九謝票，斬獲觀眾大量好評，為劇組打下強心針，電影年廿九正式上映，阿Sa及Kayan將繼續現身戲院謝票。

《祥賭必贏》講蔡卓妍飾演從嗜賭成性嘅文菁，文菁好賭最終因「爺爺」胡楓飾而被守正發現。