古天樂下令胡子彤性感T-Back謝票 與梁詠琪經典賀歲片又係時候狂loop

古天樂 、梁詠琪 、王丹妮 、胡子彤 、張文傑 等參演嘅賀歲動作喜劇，呢日舉行首映禮同影迷率先拜個早年，今年有多部賀歲片上映，古仔唔擔心票房會被分薄，反而顯出大將之風表示希望每部賀歲片都有好成績，多啲觀眾支持香港電影，而Gigi亦希望業界百花齊放，期待往後出動謝票。

古天樂同梁詠琪主演嘅賀歲新片舉行首映，場面熱鬧
古仔坦言拍喜劇雖然好開心，但度橋方面就遇上好大難題，而佢同Gigi早年合作嘅賀歲片《嚦咕嚦咕新年財》，至今仍然係新年必睇賀歲片之一，古仔坦言好難打破呢部戲嘅紀錄，知道好多觀眾年年都會睇，太深入民心，除非自己超級有信心先會再延續呢套電影，否則都唔會有續集。Gigi亦有同感，覺得《嚦》電影後座力好強，要等到被遺忘先會再考慮。
不過佢哋亦認為要超越過往經典作品一啲都唔易

子彤喺戲中嘅紅色拳擊短褲look非常搶眼，為咗唔想浪費呢個造型，佢希望有機會滿足影迷要求，仲話票房過40萬就會再著出嚟謝票，又拉埋身邊嘅German同Louise落水一齊著，古仔聽到就叫子彤直接著T-Back更吸晴。

胡子彤呢日被古仔要求著T-Back謝票，佢就即時拉German同Louise落水喇