電影泉攻略丨周秀娜為爭仔與王丹妮決鬥 古天樂 梁詠琪相隔再多年合作默契依然丨EP139

今集《電影泉攻略》王鎮泉 Jeoffrey就邀請古天樂、周秀娜、胡子彤一齊同大家介紹佢地主演嘅賀歲片《臨時決鬥》。今次古仔飾演傳奇拳王鍾磊，娜姐、子彤(Tony)、張文傑(German)都係佢門下弟子，之但係因為理念不合，所以娜姐同German就決定自立門戶，而故事就由娜姐飾演嘅孫雅雲同王丹妮飾演嘅林雪為爭仔展開。
 胡子彤 周秀娜 古天樂
至於Tony就飾演一位「不勝拳手」，雖然天資唔聰敏，但仍然努力專心堅持熱愛，更會專心訓練王丹妮飾演嘅林雪。子彤形容自己同古仔喺戲中關係同現實一樣，同樣都係亦師亦友，而佢都好開心有機會喺戲中可以「潤」下古仔。
 娜姐喺戲中同王丹妮爭仔！
戲中由古仔經營嘅「鍾磊舍」雖然係半執不倒狀態，不過導演麥啟光就喺製作特輯中特別同大家提到，如果大家有留意布景設計，「鍾磊舍」嘅大門係無時無刻都打開，就算係一家人食飯、做功課嘅戲都係呈現開門狀態，呢個設計係代表拳館嘅溫馨同和樂，就好似拍戲現場一樣。
 
而古仔同梁詠琪相隔多年再合作，默契依然滿分，Gigi嘅喜感表現亦被導演形容係「創作力量同幻想，會嚇你一跳。」，不時嘅爆肚都令王丹妮大讚好搞笑。
 胡子彤喺戲中飾演一位「不勝拳手」。
呢個禮拜嘅新片速遞有《笑傲江湖》講述身懷絕技獨孤九劍嘅令狐沖偶遇魔教新任教主東方不敗。江湖相逢，對酒當歌二人惺惺相惜，產生情愫。但人在江湖身不由己，命運令二人難逃生死決戰！
 
《青春末世物語》，講述高中生裕太同阿高形影不離，喺音樂社團室同地下音樂會中度過無數夜晚，對老師同警察嘅訓示一律當作耳邊風。一次惡作劇令二人嘅友誼經歷前所未有嘅分歧，青春嘅快樂會唔會有告終嘅一日呢？
 
《臨時決鬥》，講述廣告界女強人林雪意外發現男友同澳門女拳王孫雅雲發展外遇，好勝心令林雪決心到「鍾磊舍」向傳奇拳王鍾磊拜師學拳，但竟然遇上曾經嘅死對頭師母嘉莉。臨近比賽，經嚴格試煉嘅林雪到底可唔可以順利走上擂台，完成呢場「臨時決鬥」？
 
至於本週嘅票房龍虎榜，截至2025年1月22號中午，第三位《破・地獄》；第二位《劇場版「進擊的巨人」完結篇THE LAST ATTACK》；第一位《誤判》。
 「泉叔派福利」又嚟啦！
「泉叔派福利」又嚟啦！今次為大家帶嚟《臨時決鬥》嘅換票證！而呢次嘅問題係：「賀歲電影《臨時決鬥》入面，古天樂同梁詠琪係咩關係呢？」

知道答案嘅朋友記得喺1月23號晚上10點至12點期間，私信到「TVB娛樂新聞台Facebook專頁」，註明《電影泉攻略．泉叔派福利》，記得10點前send嚟嘅答案係唔算數，頭十名答啱嘅朋友，每人各得換票證兩張。

賀歲電影《臨時決鬥》入面，古天樂同梁詠琪係咩關係呢？