StartTalk｜陳靜自爆多年女神地位不保 與林襄片場拍戲男女蜂擁排隊合照

兩大女神陳靜Dada同林襄馬不停蹄為合作演出嘅賀歲片宣傳，兩位一同接受我哋主播王鎮泉喺StartTalk中訪談，互相傾談合作感受，林襄多謝Dada對佢照顧有加好貼心，而Dada面對新一代女神謙稱自己已失去呢個身份，因為全片場嘅男男女女都排住隊同林襄合照打卡。
林襄 同 陳靜 兩位女神喺賀歲片中合作。
林襄大讚Dada喺拍攝期間經常體貼照顧她，因為她是以國語溝通，而Dada擔心佢唔明白，所以成日會為對方充當翻譯，令佢更容易融入大家。今次亦係林襄首度正式拍電影，令佢意想不到係嚟香港拍賀歲片，自己接到工作時都嚇一跳。講到點樣應付對手爆肚時，林襄雖然不熟悉廣東話，但佢亦有一套秘方去應付。喺香港工作一段時間，林襄覺得自己嘅廣東話有所進步，仲即場示範自我介紹及講新年祝福語逗利是，聽落都算幾標準。
林襄去到片場即被包圍要求合照。
Dada與林襄兩位都係女神級，但相處起嚟完全不分彼此，全因Dada覺得林襄隻身由台灣來香港拍戲，一定會好緊張，自己好鍾意對方個性，將心比己幫助別人，很想照顧對方令佢快啲融入。而拍攝賀歲片搞笑主題亦令Dada輕鬆得多，可以容易同對手撞出火花。而電影中其中一位對手許紹雄早前同Dada喺TVB劇集《家族榮耀之繼承者》中演夫妻，今次則演父女，Dada笑言由叫老公改口為老豆。
Dada喺片場中充當林襄翻譯。
話晒兩大女神合作，喺片場應該有啲優待，Dada即謙稱：「我唔係喇，我喺片場時所有人都排隊同林襄合照，不論男女見到佢都眼晴發亮。」林襄表示感受到大家對佢嘅愛，但相信只係因為佢從台灣過來大家特別貼心照顧，而並非佢係女神而獲得喜愛，更指私下相處耐咗，其實佢好男仔頭性格。