郭富城主演電影獲獎親自答謝觀眾 創造經典角色獲編劇賜名Amaz城

郭富城Aaron、林家楝、任賢齊等主演，麥啟光執導嘅電影《臨時劫案》，榮獲第31屆香港電影評論學會大獎「最佳編劇」及推薦電影，電影公司有見及此，喺1月17號晚誠邀導演麥啟光及郭富城、編劇陳偉斌及萬芫澄等出席電影周年慶謝票場。

Aaron完成海外巡演後即趕返港現身，恭賀劇組於電影評論學會得獎，同時感謝觀眾一年來，對電影嘅支持熱度不減。Aaron喺戲中飾演梅藍天破格非常，怪相嘅哨牙、跳掣而講規矩、有禮貌嘅悍匪角色深入人心，同林家棟及任賢齊臨時結盟打劫嘅兄弟情，笑中有淚。

Aaron非常感動一年後仍見到觀眾們咁熱情高漲，又多謝導演編劇賦予佢去演一個有血有肉又有趣嘅角色，令佢演得好享受，Aaron表示有時都會掛住梅藍天呢個角色，好開心可以同觀眾重溫。現場不少觀眾更高呼電影再重映，席間導演同步宣布開拍《臨時》系列作 ，延續梅藍天帶俾觀眾嘅颠覆常規角色及快樂。

編劇陳偉斌則感謝Aaron嘅參與，形容佢係一位非常有創造力嘅演員，多謝Aaron創作咗戴假牙嘅梅藍天，又大爆佢唔單止叫郭富城，仲叫Amaz城。Aaron隨即感謝對方，同時希望借觀眾掌聲，多謝家棟同小齊：「佢哋係好好嘅演員，大家嘅火花，配合到梅藍天嘅節奏，好似打波咁，有好嘅對手，先令件事有化學作用。」最後Aaron向大家拜個早年，又預祝導演麥啟光即將上映嘅賀歲電影大賣，呼籲大家入場過一個開心蛇年。