張敬軒驚喜為韓星圭賢任嘉賓 請偶像賜韓文名「張大彬」惹全場爆笑

韓國男團Super Junior成員 圭賢 去年初來港開個人騷大受歡迎，為咗慶祝佢個人發展10周年，去年12月起佢就展開新一輪亞洲巡迴演出，舊年底由首爾起跑，1月終於嚟到香港站見粉絲。

呢晚除咗圭賢嘅精彩演出之外， 張敬軒 更驚喜現身做嘉賓，一出場軒公就誠意滿滿，以圭賢嘅韓文個人單曲《A Million Pieces》同對方合唱，令在場粉絲超級驚喜。
圭賢嘅香港站演出邀請軒公任嘉賓

軒公雖然韓文有限，但加上圭賢嘅主持功力有返咁上下，兩人透過傳譯依然流暢互動大搞氣氛，去到Talking環節絕無悶場。 圭賢先問軒公點解咁努力練習韓文歌，軒公即時回應話其實佢係KYUpiter（圭賢粉絲）一員，令圭賢心花怒放，軒公之後仲話有睇圭賢去年4月來港開騷時，選唱佢嘅《隱形遊樂場》，見到佢不斷𥄫實台邊嘅提詞機，仲大讚對方好可愛。
兩人仲合唱《隱形遊樂場》

軒公再發起新話題，自嘲年紀太大唔合適去韓國發展，但好想有一個韓文名，即場請圭賢為佢賜名。圭賢認為韓國唔少帥氣男生名中都會有個「빈彬」字，好似元斌、玄彬，所以軒公可以考慮叫張彬。 軒公以韓文讀出「張彬장빈」即引來全場爆笑，原因張彬韓文發音同「羞恥창피」發音相近。
圭賢仲為軒公改霸氣韓文名

跟住軒公希望改一個更大更有氣勢嘅名，圭賢提議張大彬（大賓），呢個名令熟悉廣東話嘅現場朋友捧腹大笑，軒公叫圭賢唔好追問翻譯。軒公同圭賢最後合唱《隱形遊樂場》為演唱會掀起全場高潮。