姜皓文為賀歲片含淚獻唱插曲歌詞勾起兒時想擁有家的感覺

姜皓文身兼監製同主演嘅賀歲電影《哈哈哈新年喜戲》獻唱主題曲外，同時參與道出佢心聲嘅插曲《那裡才是我的家》，黑哥話歌曲內容有唔少自己嘅影子，道出咗少年時嘅經歷，仲自爆當日錄音時仲忍唔住喊。

黑哥同太太一齊製作新片《哈哈哈新年喜戲》之餘，連歌曲都由黑哥負責
同樣擔任電影監製太太殷寧，指當初為電影買歌配合氣氛，但資金有限難解決版權問題，於是請朋友幫忙創作首插曲，而黑哥更話第一次聽已經被感動：「我覺得好有feel，每次聽呢首歌都會不期然喊起來，嗰種孤兒心態，同自己少年成長感覺好似，好想有個家。」殷寧亦爆料：「佢（黑哥）助手每次見到佢錄音時喊，就遞紙巾畀佢，以免被人見到。」黑哥又提到喺馬來西亞宣傳時，曾經到訪當地孤兒院，為佢哋獻唱咗呢首歌，希望可以激勵小朋友。

黑哥劇中仲同時演出兩個角色
今次拍攝新戲，黑哥特別感謝一班圈中友好宣萱、李璨琛、陳靜、阿bob等，百忙中飛到大馬拍攝。而身兼編劇嘅太太為佢度身訂造兩個角色，黑哥就勁頭痕：「其實今次唔知老婆係考驗我定整蠱我？一人飾演兩個角色，仲要兼顧埋幕後，真係幾吃力！但同時又好開心得到呢次經驗，全面了解電影嘅製作過程真係唔簡單，雖然落手落腳做好辛苦，但做完之後好有滿足感。」
仲有唔少老友參與演出，好似阿Bob嘅造型已經非常爆笑