大S離世丨遊日度新歲急病魂斷東京 徐熙媛在家人陪伴下走完一生

台灣女星大S徐熙媛憑台灣偶像劇《流星花園》中杉菜一角而爆紅，大S喺2月2號晚被傳出於日本因流感病逝嘅消息，直至3號上午，大S妹妹小S徐熙娣透過經理人證實胞姐死訊。
大S徐熙媛憑台灣偶像劇《流星花園》中杉菜一角而爆紅。
S媽透過大S恩師王偉忠發表聲明，指家人因過度傷心無法回覆傳媒，望大家體諒，由於帶熙媛回家需要在日本辦理好多繁複手續，未來幾日未能返台，S媽懇請媒體喺佢哋帶大S返台時唔好追拍。另外，大S丈夫具俊曄喺3號下午透過電話以低沉語氣回應傳媒，指太太死訊「不是假新聞」，以及表示「我不太好...」。有傳大S將於日本火化，並擇日將骨灰帶返台灣。
具俊曄未能接受太太 大S離世一事。
其實大S死訊一度被猜測成假新聞，因為大S於上月25號喺丈夫陪同下出席恩師王偉忠女兒嘅歸寧宴，當時大S面色紅潤，而小S於新年期間仲上傳同S媽嘅跳舞片。據知大S一行人於上月29號抵達日本，當日大S經已有感冒徵狀，之後就去到箱根浸溫泉，而大S病情未癒，至31號晚要救護車送院。翌日（1號）一行人轉往東京，2月2號大S不幸離世，傳當時丈夫具俊曄、大S一對仔女、S媽、小S同老公許雅鈞，以及小S二女同細女陪伴在大S身邊，但大家接受唔到大S因感冒而天人永隔。
小S同胞姐大S感情相當要好。
喺1994年，當年17歲嘅大S同15歲嘅小S組成SOS出道，姊妹兩人轉戰主持界，直至2001年大S同男團F4合作劇集《流星花園》憑杉菜一角入圍《金鐘獎》最佳女主角，大S成功奠定喺偶像劇嘅地位，隨後更影視兩線發展。
大Ｓ同黑人由情侶變成摯友。
感情方面，大S早年曾同黑人陳建州相戀七年，分手後成摯友。1998年與韓國組合酷龍成員具俊曄發展地下情，因男方公司施壓而分手。2001年大S演出《流星花園》而結識配角藍正龍，二人拍拖四年後分開。2005年大S公開同F4成員周渝民拍拖，姊弟戀只維持三年。
與周渝民嘅姊弟戀維持咗3年。
直至2010年大S喺好友安以軒生日會上，認識北京商人汪小菲，兩人見面五次後決定結婚，婚後育有一子一女，大S專心照顧家人而淡出幕前；大S於2018年初宣布陀第三胎，無奈因健康關係終止懷孕。大S曾於內地節目講懷第二胎時曾因癲癇發作，短暫缺氧而昏迷，一度停止心跳入ICU，唔少網民指責汪小菲唔應該令大S懷孕，性格火爆嘅汪小菲面對負面批評，不斷與網民隔空開戰，直至2021年底，大S宣布跟汪小菲離婚，共同撫養一對仔女。
大S與前夫汪小菲。
二人婚後育有一女一子。
大S離婚後，跟舊愛具俊曄再度聯絡，並於2022年2月8號喺韓國登記結婚，婚後具俊曄對太太體貼入微，不論喪禮婚宴都陪伴在側出席，正當大家覺得大S覓得幸福之際，喺兩人尚有五日就踏入結婚三周年嘅前夕，一對戀人卻從此陰陽永隔，令人不勝唏噓。
原本仲有5日就具俊曄同大S嘅結婚3周年紀念日。