待嫁新娘衛詩雅婚禮前夕出走荷蘭同未婚夫發布婚妙相甜蜜指數爆燈

衛詩雅（Michelle）距離2月16號嘅婚期仲有十日多啲，新娘子同未婚夫喺社交平台齊齊發布婚紗相，Michelle著上兩套婚紗同黑色晚禮服，頸上同手上戴住行頭十足嘅鑽飾，又同醫美醫生未婚夫周祉安（Kenley）甜笑對望sweet到爆。此刻Michelle依然事業心重，Michelle代表主演電影《破.地獄》去咗荷蘭參加第54屆鹿特丹國際電影節，順便去自己婚前最後一次旅行。

衛詩雅距離2月16號嘅婚期仲有十日多啲，新娘子同未婚夫喺社交平台齊齊發布婚紗相。
未婚夫Kenley喺自己嘅社交平台分享另一輯比較生活化嘅婚紗相，兩人喺教堂同茶餐廳取景，新郎哥更以英文冧爆貼文表示：「Meeting you is the luckiest and most amazing thing in my life !! （遇上妳是我人生最幸運同最棒的一件事）」

未婚夫Kenley喺自己嘅社交平台分享另一輯比較生活化嘅婚紗相。
Michelle同未婚夫拍拖兩年多，公開被求婚以來不時喺自己嘅社交平台分享籌備婚禮進度，早前佢更分享試婚紗實況，仲請網民投票選出最靚一套，暫時未見幾套婚紗喺靚相出現，留待稍後發布。Michelle坦言搞婚禮方便相當佛系，交由經理人全權負責。

Michelle同醫美醫生未婚夫周祉安甜笑對望sweet到爆。
早前《破·地獄》導演陳茂賢出席謝票場透露正趕製加長版，希望製作一個加長20分鐘嘅版本，補返岑珈其、谷德昭客串戲份外，仲會加多咗周家怡與子華嘅劇情，主要加述由黃子華飾演嘅「道生」原生家庭問題，另外仲加入衛詩雅一、兩場戲份，相信Michelle忙完婚禮後，又要回歸電影團隊宣傳加長版。