鍾柔美張馳豪作客《2025風生水起》 忽然被家燕姐撮合面都紅晒

新春期間播出嘅節目《2025風生水起》都有一定嘅捧場客，聲夢人氣歌手 鍾柔美 同 張馳豪 就會喺5號播出嘅一集出現，向麥玲玲師傅請教。屬狗嘅Yumi喺龍年沖太歲，嚟到蛇年玲玲師傅預測Yumi會雨過天青，事業運穩步向上，可以專注做多啲好歌俾樂迷聽。

玲玲師傅指Yumi同Aska新一年都會大放異彩
而屬豬嘅Aska反而喺蛇年會沖太歲，雖然變動多，但係玲玲師傅寄語Aska做藝人變動多代表多新發展係好事，反而佢對Aska密實嘅裝扮有微言，提議對方多多騷肌先係催運大法。
Aska仲被提議要多多騷肌喎

呢日拎住蜜糖出現Aska直認希望蛇年有蜜運，仲同時亦希望了解各方面運程，而身為主持嘅薛家燕忽然加入，覺得Aska同Yumi俾人好有初戀感覺，仲覺得兩人相當合襯，做起媒人撮合兩人，令佢哋勁尷尬呀。