痞子無間道丨朱敏瀚預告有大量露肉場面 JW與眾人鬧不和缺席宣傳？

大受歡迎嘅劇集《痞子殿下》續集《痞子無間道》將於喺 2月10號晚首播，呢日劇組演員齊齊着上戲服到商場宣傳，為咗配合新年氣氛，佢哋仲舞住獅出場，相面搞笑。
《痞子無間道》將於 2月10號晚首播。
周嘉洛就話監製係個瘋狂魔鬼細節控，好多表面搶眼誇張搞笑嘅劇情，背後都隱藏咗一啲細節，朱敏瀚亦指戲中所有嘢都係有原因，唔係亂做嘅。而陳瀅就指佢哋喺續集嘅服裝比上一齣更仔細，而大家嘅人設亦會有所變動。
JW因為外遊而未能出席宣傳。
提到服裝，朱仔喺《痞子無間道》入面不乏騷麒麟臂嘅服飾，連帶早前播映完嘅《奔跑吧！勇敢的女人們》入面，佢亦有多場騷肌場面，對此朱仔笑言自己已經習慣，仲話除衫戲會陸續有嚟，而嘉洛就話自己喺劇中都有露肉，不過就話自己唔係行靚仔大隻「露」線，而係行搞笑「露」線呀。
周嘉洛 陳瀅 同 朱敏瀚。
由於JW 王灝兒外遊未返港，所以大家就帶同佢嘅人形紙板到場一齊宣傳，不過佢戲中嘅CP朱仔就趁對方唔在場，話要精益求精，將JW個紙板掉落地，事後仲笑言大家不和到令JW連第一次宣傳都唔嚟，搞到陳瀅再幫忙解釋，話JW只係仲enjoy緊佢嘅新年假期，下次宣傳就會歸隊喇。
黃子恆 同 麥美恩。
麥美恩喺上一輯飾演風情萬種嘅妓院老闆娘，今次以為可以換下角色演衙門部長，但知喺劇中佢又好快要重操故業開妓院，Mayanne就話唔知點解編劇們咁鍾意睇佢演老鴇，佢笑語自己今次演得更霸氣更不羈更入型入格。而黃子恆就話自己喺戲中角色儍儍更更，不過就畀Mayanne話佢似個儍佬，一齊開工時仲會畀對方嚇親。
車婉婉同曹永廉都話好開心可以遇到《痞子》呢個團隊。
而同樣新加入嘅車婉婉，今次喺劇中飾演周嘉洛媽媽，佢同曹永廉都話開心可以遇到《痞子》呢個團隊呀。

《痞子無間道》2月10號起 逢星期一至五 20:30 翡翠台