演藝人協會茶聚過百會員慶新春 順嫂從影70載首獲獎表揚

香港演藝人協會星期三舉行春茗茶聚，唔止多位前輩會員羅蘭、余慕蓮、丁羽、馮素波、梁葆貞、黃夏蕙、陳勉良等出席，會長 古天樂 又同副會長 余安安、錢嘉樂 仲有一眾理事會成員：張繼聰、周家怡、岑珈其、游學修、小肥、趙善恆等現身支持，同逾百位會員歡聚。

演藝人協會一班理事齊齊為會員舉辦春茗聚會
自2018年就任香港演藝人協會會長嘅 古天樂 ，自疫情後即拍板復辦春茗茶聚，今年佢如往年一樣繼續向會員派利是，仲有由福幼基金會贊助嘅福袋，出席會員人人滿載而歸；而余安安、張繼聰、周家怡、成龍同張敬軒仲出心出力贊助現場抽獎禮物，軒公仲贊助3萬元現金，而成龍就贊助藍芽耳機。
逾百位演協會員齊齊出席春茗，場面非常熱鬧

席上又頒發「傑出演藝大獎」，表揚過去多年來付出寶貴青春、貢獻良多嘅前輩，陳勉良、馮素波、同「順嫂」梁葆貞榮膺獎項，順嫂更表示今次係自16歲加入演藝界以來首次得獎，佢話：「好多謝，做咗成世人第一次攞獎，我16歲入演藝界，受屋企人影響，阿爺嗰代就做戲，我先做粵劇之後拍電影，再加入無綫，喺無綫做一個節目就做咗6年，所以好多人都唔知我個真名，只知道我叫順嫂，但我唔介意，順頭順路，叫順嫂都幾好吖。」
陳勉良、梁葆貞同馮素波獲頒傑出演藝大獎

今次原來仲係「順嫂」梁葆貞入行逾70年來首次獲表揚

而馮素波得獎後亦非常興奮：「個獎座好重！80歲裡頭，都唔知仲有幾長嘅路，要漫步人生路，所以畀錢我會做，唔畀錢我都會做，如果唔做，可以做乜？為演藝界出力，祝大家搵到、做到、身體好。」另一位得獎者陳勉良，亦指協會頒發獎項給予極大鼓勵：「做人要有真誠同誠信，做任何事都要認真，咁先可以永恆。」

近年轉戰網上嘅馮素波仲話自己不言休會繼續幕前演出