蔡一傑低調與家人慶祝57歲生日 蔡一智留言「舞台正等緊你」

今日6號係蔡一傑嘅 57歲生日，胞兄蔡一智PO出家人同傑仔慶生嘅相，當中佢哋嘅好友周汶錡亦係坐上客。
蔡一傑 57 歲生日。
戴上畫家帽嘅蔡一傑臉色紅潤，精神相當不錯，而蔡一智嘅囝囝更開心地雙手環抱住傑仔膊頭合照，蔡一智喺帖文中寫道：「Happy birthday to my brother🎂」而喺Tag中除咗有「stay healthy」、「all the best」、「我祝你快高長大」等祝福外，仲特別加咗一句 #thestageiswaitingforyou，相信佢同蘇志威兩位草蜢成員，都等緊傑仔康復後再一齊喺舞台上演出。
蔡一智囝囝攬實傑仔影相。
蔡一智嘅帖文發出後，多位圈中人都有留言祝賀蔡一傑，容祖兒留言：「祝親愛的傑仔龍精虎猛越嚟越靚身體健康最重要」、蔡卓妍則留言：「祝傑仔身體健康 平安喜樂❤️❤️」而謝安琪亦送上祝福：「親愛的傑傑✨祝你身體健康平安幸福🫂❤️」