林峯感激古天樂多年來照顧 日本謝票做足預防措施

林峯放完農曆新年假，呢日再次投入工作現身商場賀新歲活動，親自上陣打響鑼鼓兼為醒獅點晴，仲獲同場堪輿學家李丞責指點迷津，提醒佢除咗買賣房地產要小心外，演唱會訓練時亦要錫身啲，以免受傷。
林峯 同 李丞責
阿峯話今個農曆新年除咗喺香港拜年外，返咗太太鄉下拜年，之前又同小朋友去咗一轉滑雪，行程可以話排到密麻麻，不過阿峯話自己最擔心嘅係喺假期期間係咁食，但嚟緊又要開演唱會，可以都係時候要keep下喇。
林峯話農曆年過後要keep fit。
講到古天樂為咗成就林峯而自願降grade做男配一事，阿峯就話好多謝對方咁多年嚟嘅照顧，對方除咗係佢嘅老闆外，亦係一位好好嘅大哥哥，阿峯指希望自己喺電影路上繼續努力，唔好辜負對方。
林峯呢日出席新年活動。
有份主演嘅電影《九龍城寨之圍城》日本票房破億，林峯話都有到通知會到當地謝票，佢又指套戲上映到而家，戲中演員都覺得好不可思議，感覺好似發緊夢咁。講到日本流感肆虐，問到出發前會唔會做定預防措施？林峯就指自己之前有到當地滑雪，亦會做好預防措施、戴口罩等。
丞丞師傅趁農曆年假期同家人外遊。
丞丞師傅就話過年期間都有同家人外遊，佢笑言小朋友比自己更大膽，因為佢哋夠膽玩機動遊戲，但自己就唔敢呀！