具俊曄結婚周年「永遠愛你」悼大S頭七 汪小菲張蘭直播帳號被無限期封禁

大S 徐熙媛 2月2日於日本因病離世，終年48歲。遺體日前於日本火化並運返台灣，而一直非常悲痛嘅 具俊曄 原本今日同大S慶祝結婚3周年，可惜就要以極沉痛心情悼念愛妻嘅頭七。具俊曄一早就於社交平台以黑底白字「영원히사랑해」(意指：永遠愛你)表達對大S嘅思念，而唔少人亦留言問候，希望佢同徐家家屬都加油保重。

具俊曄以「永遠愛你」表達結婚周年同大S頭七嘅不捨
日前具俊曄已發聲，力抗外界對佢嘅指責同有關大S遺產問題，身為第一代韓流藝人頂尖嘅佢，直言會將所有遺產交予S媽處理。經歷喪親之痛嘅徐氏一家，連日來仲受盡網絡帶風向攻擊，徐家忙於處理後事與平復心情同時，亦先後多次發聲明澄清。
大S同具俊曄22年重燃愛火，當時唔少人都認為大S會永遠幸福快樂生活

自大S離世後動作不斷更可以話一反過往態度嘅前夫 汪小菲，同佢身處對岸一直未停過口嘅媽媽 張蘭 ，兩人嘅直播平台帳號今晨亦被平台正式封禁，平台指出有部份帳號「藉機炒作，發佈謠言，違背公序良俗和道德底線，不尊重逝者及家屬，傷害公眾感情。」
因應網上評論轉發滿天飛，直播平台將張蘭同汪小菲等帳號封鎖

平台於是決定，將發佈包機付費問題嘅張蘭「契仔」帳號、張蘭名下兩個帳號，以及汪小菲嘅帳號無限期封禁。而平台副總裁亦親解箇中原因，佢指出：「對於其他幾個利用此事件進行炒作，推薦不實視頻，獲取商業利益的相關賬號。內部也進行了多次討論，鑒於這幾個賬號歷史上屢次違規被處罰而沒有改正，因此最終決定予以封禁。」

今次仲係「無限期封禁」