姜皓文帶姨甥孫神秘現身謝票 感謝餐飲商戶支持 冀帶旺香港旅遊業

姜皓文 同太太 殷寧 合力炮製嘅溫情歡樂賀歲片，上映後口碑不俗。黑哥新春期間要應付港馬兩地連串宣傳工作，直至星期日先帶同姨甥孫同一眾家人入戲院，正式坐定定觀賞自己嘅作品，亦順道答謝觀眾支持。

黑哥同太太為新片未停過，呢日又突擊向觀眾謝票喇
黑哥興奮指：「原本係同家人一齊入場，但睇戲過程發現觀眾反應好開心，於是完場一刻就起身同觀眾打招呼；多謝大家支持。咁啱太太又預備咗啲「哈哈哈金牌」，就派俾大家拜年。」
黑哥呢日其實原本係同家人入場好好睇戲

早已榮升「公公」嘅黑哥，一提到姨甥孫Honey就眉飛色舞：「呢個姨甥孫女一直好黐我；佢聽完我唱嘅《哈哈哈哈新年喜戲》主題曲，就自己成日唱，又叫我帶佢入戲院睇戲聽歌，仲跟住劇情由頭笑到尾，證明部戲老少咸宜。」
見觀眾反應咁好，於是就決定現身多謝大家支持喇

雖然電影市道低迷，不過黑哥就慶幸有唔少團體包場同商戶支持：「呢啲商戶包括餐飲、美容，睇戲之餘又可以憑票尾獲折扣；其實對觀眾嚟講絕對值回票價；我當然希望吸引到香港以外嘅觀眾睇呢部戲啦，大家入場之餘間接再帶動或者振興香港旅遊業，一舉多得。」