衛詩雅抵柬埔寨作慈善探訪 返港決心升級「五孩之母」

出爐四料影后；下星期就會成婚嘅準人妻 衛詩雅（Michelle）早前同導演劉偉恒（Benny）一家四口，參與慈善組織到柬埔寨兩個社區探訪。經過一星期深入探訪同體驗當地居民生活，令Michelle同Benny都有好深感受。

衛詩雅同劉偉恒到訪柬埔寨社區探訪
一行人先獲安排到Kuleaen社區探訪特困家庭，其後又到修葺中嘅小學，之後再經過6小時車程，到達另一個即將完成發展目標嘅Baribour社區探訪。Michelle自言自己性格感性，公司同事都提點佢要控制淚腺，但去到當地探訪時仍然忍唔住因為太過觸動而落淚。

Michelle就話：「去探訪，我知道會有感受，但係冇諗過咁多感受。好似佢哋同我化新娘妝咁，嗰個年青人得到支援有機會去學化妝，而家仲係當地嘅人氣化妝師，真係好感動，呢個係好有意義嘅新娘妝。」 

呢位待嫁新娘，仲由一位曾接受支援嘅當地人氣化妝造型師，為佢化皇室新娘妝

而Michelle最快樂嘅行程，就係喺Baribour社區同助養咗6年嘅囡囡Chankoa見面，又同對方溫馨做手工。Michelle一見到Chankoa就已經眼濕濕，不過唔想嚇親「阿女」，所以要忍住啲眼淚，佢亦表示：「我仲扮晒阿媽咁，叫佢拎啲功課出嚟睇。我即刻有啲唔好意思，因為我用當地嘅高棉語寫咗張卡畀佢，但係佢啲字靚過我好多。」Michelle表示手寫高棉語係未婚夫嘅意思：「佢叫我唔好寫英文，用返當地語言容易啲溝通，我即刻開電話睇住個翻譯嚟抄。」  

之後又同已助養多年嘅囡囡Chankoa見面

Michelle亦希望將來可以帶未婚夫再度到當地探訪：「希望15年後，我再返嚟探佢哋見證佢哋嘅改變。如果將來有小朋友，我都好希望佢哋可以睇到呢啲片段，甚至有機會嚟經歷。」

Michelle希望他日有機會帶老公同未來嘅小朋友再次到訪

Michelle坦言，頭兩日探訪特困家庭時，見到對方嘅害怕，唔只唔敢同探訪者傾偈，連眼神接觸都唔敢。但係喺後面已經發展完嘅社區，就令Michelle見到自信：「就算15、16歲都會走埋嚟同我分享。原本我都會諗，我可以幫到佢哋啲咩呢？到咗第三日，我見到希望。以前我可能好快落判斷，覺得幫唔到手，而家我覺得要花時間睇清楚、了解清楚，係真係可以幫到佢哋，蟋蟀場、菜園同學校呢啲，見到佢哋可以照顧到自己，真係好開心，我見到好多希望。」 

佢又同當地婦女齊齊煮營養食物予幼稚園學生

Michelle直言單憑相片、片段甚至佢嘅分享，對大眾嚟講可能感受唔深，但佢相信上天俾呢個探訪機會佢，必定有意義：「我真係好感謝可以嚟到呢度，我睇到佢哋好勤力，只係佢哋冇資源同方法。我哋身邊有啲人，畀咗方法佢哋、教佢哋點做，但係佢哋就係唔做，但係呢度嘅人好努力。可能只係畀一隻雞佢哋，話畀佢哋聽可以點，佢哋就可以變到而家咁，所以我覺得真係要珍惜，珍惜你哋擁有嘅一切。我唔係話一定要大家捐錢，但係至少遇到困難，唔好話『我好慘』、『我冇辦法』，辦法一定有㗎！」經過完呢次探訪體驗，Michelle回港後亦即時再多助養兩名兒童，連同已經助養嘅三名兒童，Michelle要榮升「五孩之母」喇！

劉偉恒帶同太太同囡囡探訪，希望小朋友明白幸福非必然

而Benny同太太喺探訪行程初期，對於自己能否幫助到有需要的人，同樣感到疑惑：「我哋嚟派一餐飯，鼓勵吓佢哋，大家跳一日繩，咁之後呢？我哋可以做啲咩幫到佢哋？」直到親身看到孩童、家庭與及整個社區的成長，令Benny都好感動：「勿以善小而不為。可能我哋會諗每個月嗰少少錢，每年收吓信同卡，到底我哋幫到啲咩呢？今次我哋真係睇到。改變唔係一朝一夕嘅，當中有好多困難係我哋想像唔到，但係畀啲時間就會做到。」