劉青雲郭藹明遊曼谷被「野生捕獲」 結婚27年恩愛程度羡煞旁人

劉青雲與老婆郭藹明今年踏入結婚27年，恩愛程度真係羡煞旁人，青雲唔使開工拍戲，二人總係形影不離，2月9號就有網民喺泰國機場偶遇青雲，跟住又有另一網民影到青雲同愛妻郭藹明喺曼谷EmQuartier百貨公司行街。

2月9號就有網民喺泰國機場偶遇青雲。
青雲一向係圈中出晒名嘅愛妻號，經常出雙入對，今次佢同太太去曼谷旅行，前日有網民喺社交網貼出與劉青雲喺機場嘅合照，並寫道：「中午曼谷新鮮偶遇劉青雲，雖然遮得很嚴實也沒有隨行人員，還是被我們火眼精金發現了，眼急手快立馬沖上去求合照人家也爽快答應了，很有親和力很有禮貌的藝人，拍完照又立馬把口罩戴上了。」

另一網民影到青雲同愛妻郭藹明喺曼谷EmQuartier百貨公司行街。
見青雲全程戴口罩行商場，雖然打扮低調，仍被網民「野生捕獲」，相中見佢哋兩公婆對同一牌子嘅袋情有獨鍾，青雲一個拎黑色嘅tote bag，而郭藹明則解放雙手，輕鬆孭一個白色背囊，貫徹兩公婆樸素親民作風。

有網民去年7月曾見到青雲同郭藹明喺九龍塘行商場。

此外，有網民去年7月曾見到青雲同郭藹明喺九龍塘行商場，青雲搭扶手電梯嗰陣一直將雙手放喺老婆膊頭，見到該網民影相，仲回望好友善咁揮手，令該名網民覺得好暖。