周潤發孖新戲拍檔香港出席首映 點名睇好老友梁舜燕孫仔阮浩棕

由周潤發、王寶強，劉昊然等參演嘅電影《唐探1900》，喺內地大收旺場突破28億人民幣。呢日電影團隊喺香港舉行首映禮，預祝票房大賣，電影公司老闆林建岳、發嫂、黃百鳴等都有出席。

發哥跑完半馬之後，呢日現身參與新片嘅香港首映
喺戲中飾演唐人街大佬嘅發哥，首次同寶強合作，兩人一拍即合，就連發哥對跑步嘅熱情，都感染埋對方。發哥大讚寶強係乖學生，就算佢返咗香港，寶強都會自動自發去跑步，發哥仲搞笑話自己送咗隻可以測心率嘅錶俾寶強，咁就可以日日監控佢有冇認真跑步。
首次同王寶強合作嘅發哥，仲將對方收為徒弟，每日監督跑步進展

發哥一向親民無架子，經常同演員們打成一片，不過喺片場，佢就有一定嘅威嚴，仲講明唔希望演員等埋位時，成日電話不離手，新生代演員劉昊然就坦言自己平時機不離手，不過經過發哥指教，依家開始學習放低手機，就算等戲都可以觀摩其他演員嘅演出。
新片於內地大收旺場，發哥仲被爆要求拍榴放低手機

發哥呢次喺戲中仲有一大挑戰，就係有一段長達三分鐘嘅全英語對白，發哥話自己就算喺荷李活拍過好多部戲，但都未試過有咁長嘅對白，所以難度好高，需要日夜練習，自己亦有同導演討論將對白改到盡量口語化。
呢日發哥又指睇好阮浩棕嘅發展

今次發哥繼電影《諜海風雲》後，再有機會同John Cusack合作，佢話有種久別重逢嘅開心。至於問到佢睇好邊位香港演員，發哥就點名阮浩棕，佢仲話好理解電視台演員多，好難先可以等到機會，相信阮浩棕聽到發哥嘅鼓勵一定會大受鼓舞呀！