譚玉瑛突入院電台拍檔探病送美酒 元祖兒童節目主持跌八達通變熱話

擔任兒童節目主持多年嘅 譚玉瑛 由當年《430穿梭機》同《閃電傳真機》到《至Net小人類》，唔止係幾代人嘅童年回憶，更係元祖級兒童節目主持。

阿譚同KK都係兒童節目元祖級主持

多年來同事間一直保持聯絡，不時都相約見面

近年不時現身烹飪同美食節目嘅佢，同時兼任主持電台節目，不過近日拍檔 何基佑 就突然出Post，發現譚玉瑛臥病在床。

何基佑突公開拍檔譚玉瑛臥床留醫圖片，佢嘅左腳受傷需要固定
根據何基佑嘅Post，譚玉瑛姐姐原來係因為斷腳入院，一直有指平時鍾意飲兩杯嘅佢，仲獲贈幾支美酒，仲有埋開瓶器同酒杯，等佢休養都可以嘆返杯，認真貼心理，難怪阿譚笑容滿面，估計冇咩大礙喇。
探病之餘仲帶埋靚酒、酒杯俾老友

而其實兩日前，阿譚已曾出Post，指以為自己可以跑樓梯，「結果換來動彈不得，實在🥲🥲🥲，哈哈😄往後的日子應該會更懂照顧自己喔。」
原來阿譚今次係意外斷腳

阿譚不時遊山玩水，不過私生活就甚為低調，有傳佢係圈中小富婆，更與男友相愛數十載，不過佢年前就曾否認早已秘婚嘅消息，更指自己主張不婚不育。早前阿譚遺失個人八達通被拾獲，網民先如夢初醒驚覺當年嘅友善可親姐姐已經合資格使用樂悠卡搭兩蚊車，成為一時熱話，不過阿譚保養不俗，加上樂觀開朗，所以絲毫未見疲態。

早前佢遺失八達通被拾獲，亦引起一時熱話

阿譚近年兼任電台主持，曾訪問當年拍檔朱茵

唔知幾時會再同鼎爺合作介紹刁鑽菜色呢？