衛詩雅結婚丨蔡卓妍避談復合急步入場 連詩雅想同古巨基對親家

圈中人緣甚好嘅衛詩雅，星期日同醫美醫生男友拉埋天窗，多位圈中好友 容祖兒、蔡卓妍、關智斌、古巨基及太太、陳家樂、連詩雅Shiga、方中信、溫碧霞、歐陽震華、柯煒林、邵音音、關寶慧、許靖韻、陳茂賢、朱栢康、韋羅莎、梁雍婷、周勵淇、何佩瑜、談善言、細細粒陳嘉佳、海兒、冼色麗、女團VIVA及一眾英皇藝人均有前來到賀。

衛詩雅婚宴大批對人現場到賀
盛傳與「百億麻將館太子爺」石恆聰Anthony復合嘅阿Sa，呢晚就同祖兒結伴到場，不過佢就就未有停低傳媒接受訪問急急腳入場。
近日傳出同石恆聰復合嘅阿Sa急步入場未有受訪

下晝有去觀禮嘅Shiga，話見到衛詩雅爸爸拖住衛詩雅入場時，自己即被感動到眼濕晒，當提到老公陳家樂被爆係最早喊嘅一位時，Shiga就話因為老公係做姊妹，所以喺現場大家坐唔同位，所以唔知老公有落淚。
Shiga同老公陳家樂一樣，一早已經淚灑婚禮現場

講到衛詩雅爸爸對家樂講好快就到佢個女出嫁時，家樂表現得相當抗拒，Shiga指而家老公畀個女冧到爆，之前講過要囡囡18歲以後先可以拍拖，之後又將個界線推後到21歲，再之後就話最好唔好拍拖，Shiga指雖然自己都唔捨得囡囡，但佢都想阿女搵到個錫佢嘅人。
佢仲笑指希望同古Sir嘅囝囝對親家咁話

至於問到有冇催衛詩雅快啲生一個？Shiga就爆每次衛詩雅去佢屋企同阿女玩時，都明顯覺得對方有被融化到，自己亦有趁機同對方講有個BB好開心。問到如果衛詩雅生仔嘅話，會唔會考慮同對方對親家？Shiga就話都可以考慮下，不過佢話早前見到古巨基個囝囝，覺得對方好乖，仲幻想如果可以同古Sir做親家就好喇。

《破．地獄》團隊齊齊到場恭賀

海兒同幾位型男靚仔一同到場