黃建東踏入蛇年工作有新挑戰 應邀到荷蘭做雙語主持及歌舞演出

黃建東 呢日現身黃大仙開工，呢個亦係東東新年後第一個司儀工作，令佢心情特別興奮。早前東東無懼筋膜炎參加半馬賽事，當初唔少朋友都勸佢放棄，擔心佢腳傷後一世都難以跑步，但東東經練習後堅持出戰，順利完成賽事後發覺腳部有勞損，現時接受中醫針灸同推拿治療，正逐步康復中。
東東早前帶傷與半馬，更成功完賽

東東覺得經呢一役後愛上咗跑步同運動，計劃明年再參馬拉松向運動方向發展，想身心都健康起嚟。
呢日佢為蛇年首個工作擔任主持

東東唔單止能歌善舞，口才都幾好，3月佢就有一項新挑戰，應邀到荷蘭做一個雙語主持工作，呢次係東東首度到訪荷蘭，佢非常期待呢個歐洲之旅，現正計劃工作後嘅路線圖，應該去英國、德國定係法國更好。
下月仲會飛往荷蘭擔任雙語主持

喺籌備旅程中東東亦獲得各方好友提點要小心扒手及財物安全，所以佢打算以最簡便裝束出行。另一方面就要計數，擔心自己使錢用多咗，擔心此行入不敷支。東東仲話屆時會唱歌演出搞氣氛，草議緊演釋全球Hit爆歌曲《APT.》。