九龍城寨之圍城｜日本票房衝破2億日元 導演率「城寨三子」東京謝票

城寨早年已經清拆，反而日本就曾有唔少以城寨風情作背景嘅遊樂場出現，而去年大受觀眾歡迎嘅《九龍城寨之圍城》上月於當地上映，隨即掀起一股「城寨熱」，更連當中嘅叉燒飯等美食都受到青睞。

去年大收嘅《城寨》近日於日本公映，於當地一樣有極佳成績
電影導演 鄭保瑞 同 古天樂 近日就率領「城寨三子」林峯、胡子彤仲有張文傑，現身新宿嘅戲院出席兩場謝票場，同日本觀眾互動，戲票更因而由原本2500日圓(約130港元)炒高至6.5萬日圓(約3400港元)，現場仲有觀眾直言已先後睇足20次！ 呢日嘅謝票活動，主持人仲宣布截至上周六為止，《城寨》日本票房收入已突破2億日圓(約1040萬港元)，之後即邀請導演同一眾演員現身，古天樂出場時仲以日文同觀眾打招呼：「大家好，我是古天樂，我愛你們。」

近日導演鄭保瑞、古天樂同「城寨三子」就到東京謝票

令全場400多歡眾興奮拍掌。 鄭保瑞坦然冇諗過影片會大受日本觀眾歡迎，自細已鍾情看日本動漫畫嘅佢，估計係因為《城寨》動作場面充滿漫畫元素，友上重現九龍城寨場景，從而吸引日本觀眾。 而戲中由頭打到尾嘅林峯，就非常感謝動作指導谷垣健治，因為每場動作戲令佢非常難忘。而胡子彤則對「城寨四子」於城寨高樓睇看飛機一幕非常深刻，感覺對未來充滿希望，盼望傳達堅持唔放棄嘅訊息。張文傑則對最後一場打麻將戲非常有印象，因為眾人已陪養出友誼，之後佢又以日文向觀眾問好冧爆Fans，呢日亦有唔少日本影迷帶同應援物，或以電影造型亮相，花盡心思。 

又分享佢哋對片中印象深刻嘅場面

另外，美國國際記者協會主辦嘅第29屆衛星獎(Satellite Awards)上周舉行，《九龍城寨之圍城》獲頒最佳動作獎「Best Stunt Award」，動作指導谷垣健治(Kenji Tanigaki)親身飛往美國領獎。

動作指導谷垣健治早前就飛往美國，接受美國國際記者協會主辦衛星獎，所頒發嘅最佳動作獎