十年前被童星追問戀情片出土 古天樂坦言自己招架唔住

古天樂呢日為代言嘅紅酒品牌宣傳，佢同朋友歡聚時間中都會嘆下靚酒，而且身邊嘅朋友都會帶埋心頭好一齊分享，一齊摸住酒杯底嚟傾偈，古仔就話佢哋近年傾偈嘅內容都同健康有關，單係講預防流感都有排講。

古天樂指不時都會同好友小酌，近年話題仲主要同健康有關
至於講到酒量，古仔就話平時唔會飲太多，多數都係取決當日有幾多人一齊食飯，而自己就較少會飲醉酒，平日喺酒桌上都係扮演照顧者嘅身份，如果見朋友差唔多醉就會勸對方唔好再飲，又或者係為大家安排接送車返屋企。

古仔十年前同5個童星合作電影《五個小孩的校長》，當時古仔畀幾位小朋友追問戀情嘅訪問近日就被網民返loop，講起當晚畫面古仔都仲係記憶猶新，笑言自己招架唔到佢哋求知慾咁高嘅狀態；至於講到最近成日畀網民同觀眾叫佢Daddy，問到古仔係咪榮升做爸爸，佢就敷衍咁話「係係係」。
呢日又承認早前被Fans偷襲成功錫咗佢一啖

而講到早前畀fans偷襲錫臉一事，古仔承認有呢件事，仲話當時一切都發生得好快，自己都係事後聽工作人員講先知自己被偷襲。