黃翠如佗B腰骨痛及胎動活躍頻失眠 蕭正楠陪四出覓食滿足愛妻美食慾望

臨盆在即嘅黃翠如，呢日挺住巨肚再次同老公蕭正楠出席公開活動，自從翠如佗B之後，阿蕭對老婆極度體貼，翠如喺呢段時間嘅生活習慣有大大改變，好在有暖男老公悉心照顧。

蕭正楠同太太黃翠如一齊出席活動。
阿蕭指老婆翠如失眠情況多咗，有時瞓到4、5點就醒咗，要坐兩、三個鐘先再瞓，阿蕭都戥老婆辛苦，自己有陪住老婆唔瞓，翠如話自己好難搵一個舒服嘅位瞓，因腰骨痛同埋BB踢得好緊要，翠如間唔中都會坐咗喺度，等到整個人真係好攰先再瞓。
挺住巨肚嘅翠如，話因為腰骨痛，加上BB踢得好勁，搞到佢失眠。
翠如同阿蕭連日喺屋企準備BB用品，阿蕭用心砌BB凳同BB床之際，仲曬出一套BB衫，眼利嘅網民發現BB用品嘅顏色比較中性，猜測翠如係一索得男，翠如受訪時笑指親戚朋友每個人都好確定估BB性別，佢哋好想同大家分享，之不過雙方父母想等翠如生嗰刻先知係仔定女。
蕭正楠呢段時間陪住老婆四出覓食。
阿蕭為咗迎接BB出世，請咗外傭姐姐，翠如透露暫時係諗住開刀生，不過唔知胎兒幾時入盆，又唔知BB嘅size幾時啱出世，翠如目前都係被動同等待。

翠如坦言懷孕後變為食妹，好想去唔同餐廳食嘢，嗰日就會覺得好滿足，阿蕭陪伴四出覓食，等翠如盡情大飽口福，翠如試過好想甜品，若果冇得食，就會情緒低落，更向老公撒嬌想食香蕉薄餅。被問最想食咩，翠如即話晚上想食燒肉，完全睇得出呢位靚媽對美食嘅慾望！