屹立半世紀新光戲院走入歷史 薛家燕趕返香港參與熄燈儀式

屹立北角半世紀，盛載唔少港人回憶嘅香港粵劇殿堂「新光戲院」，3月3號終於劃上句號。新光呢晚上演完最後一場粵劇《小平你好》後，3月4日零時十五分，經營新光12年嘅 李居明，就聯同粵劇文武生龍貫天、薛家燕以及電影界代表黎筱娉三位主禮嘉賓，齊齊上台進行落閘熄燈儀式，唔少戲迷都把握最後機會，特登到場打卡留念，見證呢個歷史時刻。

新光戲院經歷逾半世紀粵劇演出同電影放映後，正式告別觀眾結業
家燕姐曾經多次喺新光演出，佢當年拍劇集《皆大歡喜》時，曾經喺現場取景，留低唔少回憶，為咗見證新光戲院落幕一刻，佢更專登由杭州趕返港，家燕姐唔只一次講「唔捨得呀」，問到家燕姐喺新光戲院有冇拍拖嘅回憶，家燕姐就搞笑話因為自己成名早，所以冇乜可能同男仔單獨出街，仲話如果有男仔約佢睇戲，媽咪都一定會跟實咁話。
新光戲院舉行熄燈儀式

米雪同江美儀一樣喺呢度留低唔少腳印，如今要告別新光呢個大舞台，佢哋都覺得又可惜又唔捨得，米雪回憶10年前曾經喺新光做過粵劇，至於美儀人生嘅第一個舞台劇，就係喺新光上演，所以可以親眼見證新光戲院走入歷史，算係一個完美嘅句號。