佘詩曼大曬米蘭時裝周靚相 與工作團隊嘆美食惹網民羨慕

視后 佘詩曼 日前飛往米蘭出席時裝周，一向對衣著都好有品味嘅阿佘，更喺社交平台大方分享佢喺當地影嘅靚相。其中一輯相係阿佘應邀出席一個服裝品牌秋冬系列騷，可見佢身穿入膊橙色背心配以透視長紗裙，仙氣十足，而腰間縷空嘅設計，亦突顯佢嘅小蠻腰，真係吸晴度爆晒燈。

阿佘身穿一襲薄紗長裙若現若現相當誘人
阿佘事後話自己欣賞咗一場好精彩嘅騷，亦把握機會同品牌主設計師合照，仲讚揚對方係一位值得學習嘅好榜樣。同場仲有憑劇集《墨雨雲間》而人氣急升嘅內地男星王星越，阿佘亦同呢位小鮮肉合照，唔少粉絲仲講笑話佢哋同框好似豪門姐弟呀。 而另一輯相，阿佘就著上灰色外套配灰色西褲，呢個造型唔單止展現咗阿佘硬朗嘅一面，仲比人一種霸氣女強人氣質，唔知大家又鐘意阿佘邊一款造型呢？
另一套灰色西裝打扮就突顯佢嘅獨立自主喇

除咗睇騷之外，阿佘亦有順道同工作團隊遊覽打卡，兼品嚐當地嘅美食，咁識寓工作於娛樂，難怪阿佘都形容呢次嘅巴黎之行，係「佘詩曼工作室」年度旅行啦。唔少網民睇到啲相，都投入羨慕眼光，留言問阿佘「工作室仲請唔請人？」、「姐姐有沒有感覺你的工作室缺一個人，缺了我。」「寶寶什麼時候把我招進你們的工作室? 」

佢又同工作人員趁機品嚐當地美食