孫耀威指胞妹未受婚外情風波影響 稱要睇清啲壞人好好避開

孫耀威呢日剛喺吉隆坡飛返港，就馬不停蹄去為「仁濟醫院周年慈善餐舞會」擔任表演嘉賓，佢透露下月將會喺馬來西亞舉行演唱會，所以呢次去吉隆坡係出席發布會，問到屆時會唔會搵胞妹孫美賢任表演嘉賓？孫耀威就話唔會喇，佢指妹妹早前先同老公一齊飛咗去滑雪慶祝生日，所以對方應該冇假期再飛。

孫耀威將於大馬舉行個人騷
提到孫美賢去年捲入婚外情風波，搭上《中年好聲音2》參賽者鄭梓浩，問到作為哥哥嘅孫耀威有冇關心下妹妹，了解事情嘅始末？孫耀威就表示冇咩大不了，佢指雖然妹妹唔係圈中人，但都有同對方講過，有時參加啲活動媒體報道會誇張啲，或者有時未必所有報道都屬實，但好多時好多嘢未必要全部講清楚解釋清楚，佢仲同妹妹講唔通日日開記招澄清咩，最重要係自己知道自己做緊咩，同埋知道件事入面有啲咩人係唔好，自己要去小心要去避開。
身為哥哥嘅佢亦回應孫美賢牽涉婚外情嘅事件

至於問到妹妹嘅情緒？孫耀威就指妹妹14歲就自己一個去英國讀書，事業各樣嘢都係自己捱返嚟，係一個好堅強嘅女仔，而自己見到佢而家亦相當開心。
顏米羔、陳譽文同劉河呢日亦有參與

同場嘅仲有顏米羔、陳譽文及劉可等，米羔話自己以前係以攝影師身份出席仁濟舞會，而近兩年先以歌手身份出席，由鏡頭後變成鏡頭前嘅嘉賓，令佢相當感觸。早前米羔被誤認成Patrick Sir，呢日佢都有講返件事，仲話覺得好榮幸，因為佢都覺得Patrick Sir好型呀。