甘比首度拍廣告展女性魅力 工作太忙靠淋巴按摩減壓

從未接拍商業廣告嘅富豪劉鑾雄太太甘比(陳凱韻)，日前為護膚品牌拍攝宣傳片。拍攝當日，甘比不斷同導演溝通，親自參與每一個畫面嘅構思，務求呈現出最完美的效果。

甘比最近首次接拍廣告，仲參與當中唔少構思
全新宣傳片段中，身穿一襲優雅紫色長裙驚艷亮相嘅甘比，喺綻放嘅玫瑰背後步入鏡頭，舉手投足間充滿優雅同自信，展現女性力量與柔美，寓意每位女性都好似玫瑰一樣，喺歲月中綻放獨特光芒，發揮無限潛能，打造屬於自己嘅璀璨人生。
甘比身兼媽媽同公司高層，仲有唔少興趣要兼顧

作為三孩之母嘅甘比，一向係香港成功女性典範，除咗繁重集團工作、慈善基金、仲兼顧藝術工作同鈎織店事務，忙到無時停嘅佢原來好多時都係每日瞓一、兩小時，真係「Superwoman」。

對於護膚心得，甘比深信肌膚需由內到外保養，心情同生活方式同樣重要：「平時要兼顧事業同家庭，識得放鬆非常重要，因為每日都會面對各種挑戰，保持輕鬆心態先可以積極應對困難，所以我會做淋巴按摩幫自己減壓放鬆，仲會變得更精神！」